Ä Teil vodä eigete Schnittblueme het fertig blüiht für das Jahr.
scho im Septämber si Tämperature bi üs uf 900 m.ü.M vereinzelt cheuter worde.
Mit 0° Grad hi d Blueme no dr cheuti trotzt. Ahfangs Oktober hets nomau klaari Nächt gäh & ds Fäud het no ä Froschtschutz über d Bluemechöpf verteilt überchoh. Gliitä hei si trotzdäm sehr – di zarte Chnöspeli hei ä bruuni Farb ahgno u die blüihende si langsam verweukt.
Ihr Nacht vom 11 ufe 12 Oktober isch ds hüürige Bluemejahr bi üs zum grosse Tiu g`ändet.
Ä wunderbari erschti Erfahrig hi mir gsammlet mit eigete Schnittblueme, dr Pfleg u vorauem dr Ahzucht.
Im Lade wirds no einzelni Schnittblueme vor Oberei ha, die räschtleche möchte mir so langs geit vo Schwizer Fäuder bezieh. Irgendinisch isch das de aber o fertig & de wird ds Sortimänt im Bluemelade winterlech. Fürne Überraschig wirds sicher immer länge, doch di voui Schöpfig a Blueme überlah ig ume am Zyklus vor Natur & dämentsprächend am nöie Früehlig u am nächste Jahr, we d Sunne dr Bode wieder wärmt u laht la erwache.
